பருத்தித்துறை வடை

எங்கட ஊர் இரண்டு சாப்பாட்டுச் சாமான்களுக்கு பேர்போனது. ஒண்டு பருத்துறை (பருத்தித்துறை) வடை, மற்றது ஓடக்கரை அப்பம்.

எங்கட ஊர் ஆக்கள் வெளியூரில இருக்கிற தங்களோட இனசனத்துக்கு அன்பை காட்டவேண்டுமெண்டால் ஏதாவது நொறுக்குத்தீனிதான் அனுப்புவாங்கள். அதனாலேயோ என்னவோ தெரியாது எங்கட ஊர் ஆக்கள் மாசக்கணக்கில வைச்சுச் சாப்பிடக்கூடிய நொறுக்குத்தீனிகள் செய்வதில கெட்டிக்காரர். பொரிவிளாங்காய், உழுத்தம்பணியாரம், பகோடா, முறுக்கு வகைகள் எண்டு எது செய்தாலும் ஒரு ஆறு மாசத்துக்காவது வைச்சுச் சாப்பிடக்கூடிய மாதிரிச் செய்வாங்க. அப்படிச் செய்வதில இன்னுமொண்டுதான் இந்தப் பருத்தித்துறை வடை.

அதில பருத்தித்துறை வடை கொஞ்சம் பிரபலமானது. முன்னரெல்லாம் எந்த ஊராக்களும் பருத்தித்துறைக்கு வந்தால் கேட்டு வாங்குவாங்கள். இப்பவெல்லாம் அதுக்கு கேள்வி கூடிவிட்டதால இலங்கைத் தமிழர் இருக்கிற இடங்களில எல்லாம் செய்யுறாங்கள். ஆனால் பெயர் மட்டும் அப்படியே நிலைச்சு விட்டது. இப்ப கூட பருத்தித்துறையில செய்ஞ்ச பருத்தித்துறை வடைக்கு எண்டு தனி மரியாதை இருக்கு. எங்கட ஊரில இருந்து உலகம் பூரா ஏற்றுமதியாகிக்கொண்டிருக்குது.

இதோ பருத்தித்துறை வடையின்ர அடிப்படையான சமையல் குறிப்பு...

தேவையான பொருட்கள்:
உழுத்தம் பருப்பு - 1 சுண்டு
கோதுமை மா - 1 சுண்டு
செத்தல்மிளகாய்ப்பொடி - 2 தே.க.
பெருஞ்சீரகம் - 1 தே.க.
உப்பு - அளவாக
கறிவேப்பிலை
எண்ணெய்

செய்முறை:
உழுந்தை இரண்டு மணிநேரம் ஊறவைச்சு, தோல்நீக்கி, சுத்தம் செய்து, கோதுமை மா, மிளகாய்ப்பொடி, பெருஞ்சீரகம், சின்னதா வெட்டின கறிவேப்பிலை எல்லாத்தையும் ஒண்டு சேத்து இறுக்கமாக கொஞ்சமா தண்ணி விட்டுக் குழைத்து மெல்லிசான சிறு வட்டங்களாகத் தட்டிப் பொன்னிறமாக பொரித்தெடுங்கோ.

சுவை கூட வேண்டுமெண்டால் சின்னவெங்காயத்தையும் சின்னஞ்சின்னனா வெட்டிப்போடலாம். ஆனால் அதிக காலம் வைச்சு எடுக்கேலாது.

பிற்குறிப்பு: உழுந்தை அரைப்பதில்லை.

வீரசிங்கம் மண்டபம், யாழ்ப்பாணம்

வீரசிங்கம் மண்டபம்

உலகம் 200 மாடிகளைக் கொண்ட பர்ஜ் கலிபா (பர்ஜ் துபாய்) கோபுரத்தைக் கண்டிருக்கும் இந்நேரத்தில் நான்கே மாடிகளைக் (ஐந்து தளங்கள்) கொண்ட வீரசிங்கம் மண்டபம் யாழ் நகரின் உயரமான கட்டடமாக விளங்குகின்றது. யாழ் நகரில் பொது நிகழ்வுகளுக்கு களம் அமைத்துக்கொடுப்பதற்காக யாழ் கூட்டுறவு சங்கங்களின் சமாசத்தினால் 1960 -களில் யாழின் கூட்டுறவுத்துறை ஆர்வலரும் முன்னாள் சாவகச்சேரி பாராளுமன்ற உறுப்பினருமான திருவாளர் வீரசிங்கத்தின் ஞாபகார்த்தமாக இந்தக்கட்டடம் எழுப்பப்பட்டது. யாழ் கோட்டை சுற்றாடலில் யுத்தத்தின் அகோரங்களுக்கு முகங்கொடுத்த வீரசிங்கம் மண்டபம் இன்றுவரை அசையாதிருப்பது அதிசயம்தான்.

பூகோளவியல் அமைவிடம்: 9° 39' 51.75" வடக்கு (அகலாங்கு), 80° 0' 37.99" கிழக்கு (நெட்டாங்கு)

Geographic coordinate: +9° 39' 51.75", +80° 0' 37.99" (9.664376,80.010552)

துரையப்பா விளையாட்டரங்கு, யாழ்ப்பாணம்

யாழ்ப்பாணத்தின் பிரதான விளையாட்டரங்கான துரையப்பா விளையாட்டரங்கு, யாழ் நகரத்தின் பின்புறமாக அமைந்துள்ளது. விளையாட்டுகளுக்கு களம் அமைத்துக் கொடுக்கும் இந்த அரங்கு கொலைக்களமாகவும் விளங்கியது என்பதற்கு அங்கிருக்கும் நீதிமன்றத் தீர்ப்பு வழங்கப்படாத மனிதப்புதைகுழி சான்று பகருகின்றது.